ரூ.ஒரு லட்சம் பரிசுடன் உ.வே.சா. உலகத் தமிழர் ஆராய்ச்சி விருது

முத்துப்பேட்டை ரகமத் அறக்கட்டளை சார்பில் ஆண்டுதோறும் உ.வே.சா. உலகத் தமிழர் ஆராய்ச்சி விருது வழங்கப்படும் என்று அந்த அறக்கட்டளையின் நிறுவனர் எம்.ஏ.முஸ்தபா தெரிவித்தார்.

முத்துப்பேட்டை ரகமத் பெண்கள் மெட்ரிக் பள்ளியில் சனிக்கிழமை நடைபெற்ற இலக்கிய மன்ற விழாவில் அவர் இதை தெரிவித்தார்.அறக்கட்டளை சார்பில் ஆண்டுதோறும் வழங்கப்படவுள்ள உ.வே.சா. உலகத் தமிழர் ஆராய்ச்சி விருது ரூ.ஒரு லட்சம் ரொக்கப் பரிசும், சான்றிதழும் கொண்டது.

                                                                       

இந்த விருதுக்கு உரியவர்கள் தஞ்சை தமிழ்ப் பல்கலைக்கழகத்துடன் ஒருங்கிணைந்து தேர்ந்தெடுக்கப்படுவர் என்றும் அவர் கூறினார். உ.வே.சா. தமிழ் ஆராய்ச்சி விருதுக்கு நிகழாண்டு தலைப்பு "ஐம்பெரும் காப்பியங்களில், காப்பியமும் தமிழன் வாழ்வியலும்' என்பதாகும். 2015 மார்ச் 31-க்குள் கட்டுரைகளை அனுப்பிவைக்க வேண்டும். தொடர்புக்கு செல்பேசி எண் 9486788776.

இந்த விழாவில், சிங்கப்பூர் சிம் பல்கலைக்கழக தமிழத்துறைத் தலைவர் ரெத்தின வெங்கடேசன் பேசியது:
மனிதனின் அடையாளம் அவனது தாய்மொழியாகும். பல ஆயிரம் ஆண்டுகள் பழைமையான தமிழ் மொழி சிங்கப்பூர், மலேசியா போன்ற நாடுகளில் வேற்று மொழி கலப்பில்லாமல் பேசப்படும் நிலையில், தமிழகத்தில் தமிழர்களே புரிந்து கொள்ள முடியாத அளவுக்கு பேசப்படுவது வேதனையளிக்கிறது.

வல்லினம் த, மெல்லினம் ம, இடையினம் ழ மூன்றும் சேர்ந்து தமிழானது. அதுபோல மனிதர்களும் வேற்றுமைகளை மறந்து ஒன்றுபட வேண்டும்.
ஆசிரியர், மாணவர் உறவுக்கு இலக்கணமாகத் திகழ்ந்தவர்கள் மகா வித்வான் மீனாட்சி சுந்தரம்பிள்ளையும், உ.வே.சாவும். இதில் உ.வே.சா அலைந்து, திரிந்து பல்வேறு நூல்களை பதிப்பித்ததன் காரணமாகவே தமிழுக்கு இன்று செம்மொழி அந்தஸ்து கிடைத்தது என்றார்.

நிகழ்ச்சிக்கு, திருவாரூர் திரு.வி.க. அரசு கலைக் கல்லூரி தமிழ்த் துறைத் தலைவர் முனைவர் குமரேசமூர்த்தி தலைமை வகித்தார். நிகழ்ச்சியையொட்டி, மாணவிகளின் கலை, பாடல்கள் நிகழ்ச்சியும், மழைநீர் சேகரிப்பு குறித்த பட்டிமன்றமும் நடைபெற்றன.

அரசு பொதுத்தேர்வுகளில் சிறப்பிடம் பெற்ற மாணவிகளுக்கும், இலக்கிய நிகழ்ச்சிகளில் வெற்றி பெற்றவர்களுக்கும் பள்ளி தாளாளர் எம்.ஏ.முஸ்தபா, சிறப்பு விருந்தினர் முனைவர் ரெத்தின வெங்கடேசன் ஆகியோர் பரிசுகளை வழங்கினர்.