சென்னை பல்கலைக்கழகம் திட்டம் ஆன்லைன் மூலமே மாணவர்கள் தேர்வு எழுதி ஆசிரியர்கள் மதிப்பிடும் முறை துணைவேந்தர் ஆர்.தாண்டவன் பேட்டி

சென்னை பல்கலைக்கழகத்தில் அடுத்த ஆண்டு முதல் ஆன் லைன் மூலம் மாணவ- மாணவிகள் தேர்வு எழுதி விடைகளை ஆன்லைனிலேயே ஆசிரியர்கள் மதிப்பிடும் முறையை கொண்டு வர திட்டமிட்டுள்ளதாக துணைவேந்தர் ஆர்.தாண்டவன் கூறினார்.

சென்னை பல்கலைக்கழகம்

சென்னை பல்கலைக்கழகத்தின் கட்டுப்பாட்டில் 175-க்கும் மேற்பட்ட கலை அறிவியல் கல்லூரிகள் உள்ளன. கடந்த சில வருடங்களாக சென்னை பல்கலைக்கழக தேர்வு முடிவுகள் வெளிவருவதில் காலதாமதம் ஏற்பட்டது. அதனால் விரைவாக முடிவை வெளியிட வேண்டும் என்று மாணவ-மாணவிகளும், பெற்றோர்களும் எதிர்பார்த்தனர்.

ஆன்லைன் மூலம் தேர்வு

இது தொடர்பாக தேர்வுத்துறையில் சீர்திருத்தம் கொண்டு வருவீர்களா? என்று கேட்டதற்கு துணைவேந்தர் ஆர்.தாண்டவன் கூறியதாவது:-

சென்னை பல்கலைக்கழக தொலைதூரக் கல்வித்துறையில் நடவடிக்கை அனைத்தும் கம்ப்யூட்டர் மயமாக்கப்பட்டுள்ளது. தேர்வுத்துறையில் அனைத்தும் கம்ப்யூட்டர் மயமாக்கப்பட்டதால் தேர்வு முடிவுகளை 25 நாட்களுக்கு முன்பாக வெளியிட்டுள்ளோம்.

இன்னும் கூடுதல் வசதியாக மாணவ-மாணவிகள் ஆன்லைனில் கம்ப்யூட்டரிலேயே தேர்வு எழுதி, அந்த விடைகளை ஆசிரியர்களும் ஆன்லைனிலேயே மதிப்பீடு செய்து விரைவாக தேர்வு முடிவை வெளியிட திட்டமிட்டுள்ளோம். இந்த திட்டம் முழுமையாக தயாரிக்கப்பட்டு அது சிண்டிகேட் கூட்டத்தில் வைத்து, முடிவு எடுக்கப்படும்.

இவ்வாறு துணைவேந்தர் ஆர்.தாண்டவன் தெரிவித்தார்.