தமிழகம் முழுவதும் இன்று போலியோ சொட்டு மருந்து முகாம்

தமிழகம் முழுவதும் இன்று போலியோ சொட்டு மருந்து முகாம் நடைபெறுகிறது.ஐந்து வயதுக்குட்பட்ட குழந்தைகளுக்கு முதல் தவணையாக இன்றும் இரண்டாவது தவணையாக அடுத்த மாதம் 22-ம் தேதியும் போலியோ சொட்டு மருந்து முகாம் நடைபெறும்.
காலை 7 மணி முதல் மாலை 5 மணி வரை இந்த முகாம் நடைபெறவுள்ளது. மாநகராட்சி நலவாழ்வு மையங்கள், அரசு மருத்துவமனைகள், பள்ளிகள், மருந்தகங்கள், சத்துணவு கூடங்கள், தனியார் மருத்துவமனைகள், ஆரம்ப சுகாதார மையங்கள், ரயில் மற்றும் பேருந்து நிலையங்கள் என தமிழகம் முழுவதும் மொத்தம் 43 ஆயிரத்து 51 சொட்டு மருந்து மையங்கள் செயல்படவுள்ளன.

சென்னையில் தங்கியுள்ள வெளி மாநிலத்தவர்களின் குழந்தைகளுக்கும் முகாமில் சொட்டு மருந்து கொடுக்கப்படும். தொலைதூரப் பகுதி, மலைவாழ் பகுதி, எளிதில் பயணம் மேற்கொள்ள முடியாத பகுதி மக்களுக்காக ஆயிரம் நடமாடும் குழுக்கள் மூலம் சொட்டு மருந்து வழங்க ஏற்பாடு செய்யப்பட்டுள்ளது.