சார்பதிவாளர் காலியிடங்கள் நிரப்ப அரசுக்கு வலியுறுத்தல்

'பதிவுத்துறையில் அனைத்து நிலைகளிலும் காலிப்பணியிடங்களை நிரப்ப அரசு முன்வர வேண்டும்,' என தமிழ்நாடு பதிவுத்துறை சார்பதிவாளர்கள் சங்கம் வலியுறுத்தியது.

மதுரையில் சங்க மாநில தலைவர் இளங்கோவன் கூறியதாவது: 1975 முதல் 1986 வரையிலான பழைய அட்டவணையை கம்ப்யூட்டரில் பதிவேற்றம் செய்து மக்களுக்கு சீரிய முறையில் பதிவு விவரங்களை வழங்க கால அவகாசம் வழங்கப்பட வேண்டும். பதிவு ஆவணங்கள் தயார் நிலையில் இருந்த போதும் சிடி மற்றும் ஹாலோகிராபிக் ஸ்டிக்கர்ஸ் இருப்பு இன்மையால் தாமதமாகிறது. எனவே போதிய சிடி மற்றும் ஹாலோகிராபிக் ஸ்டிக்கர்ஸ் தட்டுப்பாடு இன்றி கிடைக்க அரசு நடவடிக்கை எடுக்க வேண்டும். அரசுக்கு வருவாய் இழப்பு ஏற்படுத்தாத நிலையிலும் பதிவுத்துறை அலுவலர்கள் மீது அவதூறு பரப்புவோர் மீது பதிவுத்துறை தலைவர்கள் குற்ற நடவடிக்கை எடுக்க வேண்டும். இதுகுறித்து மதுரையில் நடந்த பொதுக்குழுவில் தீர்மானங்கள் நிறைவேற்றப்பட்டுள்ளது என்றார்.