கல்வி பெறும் உரிமைச் சட்டத்தை முறையாகச் செயல்படுத்த வேண்டும்

ல்வி பெறும் உரிமைச் சட்டத்தை தமிழக அரசு முறையாகச் செயல்படுத்த வேண்டும் என்று மதிமுக பொதுச்செயலாளர் வைகோ வலியுறுத்தினார்.

இது தொடர்பாக சனிக்கிழமை அவர் வெளியிட்ட அறிக்கை: இலவசக் கட்டாயக் கல்வி உரிமைச் சட்டத்தின்படி கடந்த 3 ஆண்டுகளில் தனியார் பள்ளிகளில் சேர்க்கப்பட்ட மாணவர்களுக்கு வழங்க வேண்டிய கல்விக் கட்டண நிலுவைத் தொகை ரூ.150 கோடியை தமிழக அரசு இதுவரை வழங்கவில்லை.

அதனால், கல்வி பெறும் உரிமைச் சட்டத்தின் கீழ் ஒரு மாணவரைக்கூட வரும் கல்வியாண்டில் சேர்க்க மாட்டோம் என்று தனியார் பள்ளிகள் சங்க மாநாட்டில் தீர்மானம் நிறைவேற்றப்பட்டுள்ளது.

கடந்த 3 ஆண்டுகளில் 25 சதவீத இடஒதுக்கீட்டின்படி தனியார் பள்ளிகளில் 1.43 லட்சம் குழந்தைகள் சேர்க்கப்பட்டிருக்க வேண்டும்.

ஆனால் 2013-14-ஆம் கல்வி ஆண்டு வரை மொத்தம் 16,194 குழந்தைகள் மட்டுமே சேர்க்கப்பட்டுள்ளனர் என்பது வருத்தத்துக்குரியது. கல்வி பெறும் உரிமைச் சட்டத்தை அதிமுக அரசு முறையாகச் செயல்படுத்தவில்லை.

வரும் கல்வியாண்டிலாவது அதனை முறையாக நடைமுறைப்படுத்த அரசு நடவடிக்கை எடுக்க வேண்டும். தனியார் பள்ளிகளுக்கு அரசு வழங்க வேண்டிய நிலுவைத் தொகையையும் உடனடியாக வழங்க வேண்டும் என்றார்.