நவம்பர் 4-ம் தேதி நடக்கிறது: தேசிய திறனாய்வு தேர்வு

பத்தாம் வகுப்பு படிக்கும் மாணவர்களில் திறமையானவர்களை அடையாளம் கண்டு அவர்களை ஊக்குவிக்கும் வகையில் கல்வி உதவித்தொகை வழங்குவதற்காக தேசிய திறனாய்வுத் தேர்வு நடத்தப்படுகிறது.
தேசிய கல்வி ஆராய்ச்சி மற்றும் பயிற்சி கவுன்சில் (என்சிஇஆர்டி) நடத்தும் இந்தத் தேர்வு முதல்கட்டமாக மாநிலஅளவிலும், அதில் தேர்ச்சி பெறுவோருக்கு 2-வது கட்டமாக தேசிய அளவிலும் நடத்தப்படும்.இந்நிலையில், மாநில அளவிலான முதல் கட்ட தேர்வு நவம்பர் 4-ம் தேதி நடைபெற உள்ளது. தமிழகத்தில் என்சிஇஆர்டி சார்பில் இத்தேர்வை அரசு தேர்வுத் துறை நடத்துகிறது.தமிழகத்தில் ஒரு லட்சத்து 58 ஆயிரத்துக்கும் மேற்பட்ட மாணவ, மாணவிகள் தேர்வு எழுத இருப்பதாக அரசு தேர்வுத் துறை அதிகாரி ஒருவர் தெரிவித்தார்.ஆண்டுதோறும் சுமார் ஆயிரம் மாணவர்கள் என்சிஇஆர்டி கல்வி உதவித்தொகை திட்டத்துக்கு தேர்வு செய்யப்படுகின்றனர்.

அவர்களுக்கு பிளஸ் 2 வரை மாதந்தோறும் ரூ.1,250, அதன்பிறகு இளங்கலை, முதுகலை படிக்கும்போது மாதந்தோறும் ரூ.2,000 வழங்கப்படுகிறது. பிஎச்டி படிப்புக்கு பல்கலைக்கழக மானியக் குழு(யுஜிசி) விதிமுறைப்படி உரிய உதவித் தொகை வழங்கும் என்பது குறிப்பிடத்தக்கது.