மின்னல் தாக்கியபோது விபரீதம்: சார்ஜ் போட்டபடி செல்போனில்வீடியோ பார்த்த மாணவர் பலி

சோழவரம் அருகே மின்னல் தாக்கிய போது வீட்டினுள்ளே சார்ஜரில் இருந்த செல்போனில் வீடியோ படம் பார்த்துக் கொண்டிருந்த கல்லூரி மாணவர் பரிதாபமாக உயிரிழந்தார்.
திருவள்ளூர் மாவட்டம், சோழவரம் அருகே உள்ள நல்லூர், நாகாத்தம்மன் நகர், கலைஞர் கருணாநிதி தெருவைச் சேர்ந்தவர் சித்திரைவேல் மகன் ரஞ்சித்குமார்(21). இவர்,திருவள்ளூர் அருகே உள்ள தனியார் கல்லூரியில் பி.இ. படித்து வந்தார்.நேற்று முன்தினம் நள்ளிரவு, சார்ஜரில் போட்டபடி செல்போனில் வீடியோ பார்த்துக் கொண்டிருந்தார். அப்போது, நல்லூர் சுற்று வட்டாரப் பகுதியில் இடி மின்னலுடன் கனமழை பெய்து கொண்டிருந்தது.

இந்நிலையில், வீட்டின் வெளியே திடீரென மின்னல் தாக்கியது. அப்போது ஏற்பட்ட கதிர்வீச்சு ரஞ்சித்குமார் மீது பாய்ந்து மயங்கி விழுந்தார். அவரை செங்குன்றம் பகுதியில் உள்ள தனியார் மருத்துவமனையில் சேர்த்தனர். அவரை பரிசோதித்த டாக்டர்கள், அவர் மின்னல் தாக்கியதால் ஏற்பட்ட கதிர்வீச்சு காரணமாக உயிரிழந்துவிட்டதாகத் தெரிவித்தனர்.இதுகுறித்து சோழவரம் போலீஸார் விசாரித்து வருகின்றனர்.