உயர்த்தப்பட்ட அரசுப்பேருந்து கட்டணத்தை குறைத்தது தமிழக அரசு

தமிழகத்தில் உயர்த்தப்பட்ட அரசுப்பேருந்து கட்டணத்தை தமிழக அரசு குறைத்துள்ளது. சாதாரணப் பேருந்துகளில் கட்டணம் கிலோமீட்டருக்கு 60 பைசாவில் இருந்து 58 பைசாவாகவும், நகர மற்றும் மாநகரப் பேருந்துகளில் குறைந்தபட்ச கட்டணம் ரூ.5 லிருந்து ரூ.4 ஆக குறைக்கப்பட்டுள்ளது.
மாற்றியமைக்கப்பட்ட கட்டணங்கள் நாளை முதல் அமலுக்கு வரும் எனவும் தமிழக அரசு தெரிவித்துள்ளது.

விரைவுப் பேருந்துகளில் கட்டணம் கிலோமீட்டருக்கு 80 பைசாவில் இருந்து 75 பைசாவாகவும், குளிர்சாதனப் பேருந்துகளில் கட்டணம் கிலோமீட்டருக்கு 140 பைசாவில் இருந்து 130 பைசாவாக குறைக்கப்பட்டுள்ளது. ரூ.1000 மாதாந்திர பேருந்து பயண அட்டை, முதியோருக்கான கட்டணமில்லா பயண அட்டை, மாணவர்களுக்காக பேருந்து பயண சலுகை தொடர்ந்து வழங்கப்படும் எனவும் கூறியுள்ளது. பேருந்து கட்டணக் குறைப்பு மூலம் நாளொன்றுக்கு ரூ.4 கோடி நஷ்டம் ஏற்பட்டது எனவும் தமிழக அரசு தெரிவித்துள்ளது. பேருந்து கட்டண உயர்வு குறித்து மறுபரிசீலனை செய்யப்படும் என தமிழக துணை முதல்வர் ஓ.பன்னீர் செல்வம் இன்று தேனியில் பேட்டியளித்தது குறிப்பிடத்தக்கது.

பேருந்து கட்டண குறைப்பு போதாது, பேருந்து கட்டணம் பைசா கணக்கில் குறைத்தது சரியில்லை என துரைமுருகன் கண்டனம் தெரிவித்துள்ளார். மேலும் திமுக அறிவித்தபடி நாளை போராட்டம் நடத்தப்படும் எனவும் துரைமுருகன் கூறியுள்ளார்.