தமிழக அரசுப் பள்ளிகளில் எல்.கே.ஜி., யு.கே.ஜி. வகுப்புகளைத் தொடங்க வேண்டும்

தமிழக அரசுப் பள்ளிகளில் எல்.கே.ஜி., யு.கே.ஜி. வகுப்புகளைத் தொடங்க வேண்டும் என அகில இந்திய சமத்துவ மக்கள் கட்சியின் தலைவர் சரத்குமார் வலியுறுத்தினார்.

இதுதொடர்பாக செவ்வாய்க்கிழமை அவர் வெளியிட்ட அறிக்கை:

ஒரு காலத்தில் 5 வயது முடிந்தால்தான் பள்ளிப்படிப்பு தொடங்கும். இப்போது எல்.கே.ஜி., யு.கே.ஜி. வகுப்புகள் தொடங்கியதில் இருந்து 3 வயதில் இருந்தே பள்ளிப்படிப்பு தொடங்கிவிட்டது. இப்போது 3 வயது முடிவதற்குள் "பிரீ கே.ஜி.' வகுப்பில் சேர்க்க ஆரம்பித்துள்ளனர்.

கணவன், மனைவி இருவரும் வேலைக்குச் செல்வதால் 3 வயதிலேயே பள்ளிகளுக்கு அனுப்புவது அவசியமாகி விட்டது. இதனைப் பயன்படுத்தி தனியார் பள்ளிகள் அபரிமிதமான கட்டணம் வசூலித்து வருகிறார்கள்.

இதனால் ஏழை, நடுத்தர குடும்பங்களைச் சேர்ந்தவர்கள் பெரும் துயரத்துக்கு ஆளாகியுள்ளனர். எனவே, தமிழக அரசுப் பள்ளிகளில் எல்.கே.ஜி., யு.கே.ஜி. வகுப்புகளைத் தொடங்க வேண்டும். இதன் மூலம் பல்லாயிரக்கணக்கான இளைஞர்களுக்கு வேலைவாய்ப்பும் கிடைக்கும் என சரத்குமார் தெரிவித்துள்ளார்.