தமிழகத்தில் தமிழைப் படிக்காமலேயே பட்டம் பெறும் அவல நிலை: கருணாநிதி குற்றச்சாட்டு

தமிழகத்தில் அனைத்துப் பள்ளிகளிலும் தமிழை ஒரு பாடமொழியாக கற்பிக்கும் நடவடிக்கை, வெறும் ஏட்டளவில் மட்டுமே இருப்பதாக திமுக தலைவர் கருணாநிதி விமர்சித்துள்ளார்.அவர் வெளியிட்டுள்ள அறிக்கையில்,


தமிழகத்தில் பல்கலைக்கழகம் வரை தமிழைப் படிக்காமலேயே பட்டம் பெறும் அவல நிலை நிலவுவதாக கூறியுள்ளார். தமிழை ஒரு பாடமாக்க திமுக ஆட்சியில் மேற்கொள்ளப்பட்ட நடவடிக்கைகளை அவர் பட்டியலிட்டுள்ளார்.நாளிதழ் ஒன்றில் வெளியான கட்டுரையை மேற்கோள் காட்டியுள்ள கருணாநிதி, அதிமுக ஆட்சியில் தமிழை ஒரு பாடமாக்கும் நடவடிக்கைகள் அனைத்தும் வெறும் அரசாணைகளாக, ஏட்டளவில் மட்டுமே இருப்பதாக குறை கூறியிருக்கிறார்.

கடந்த 2003-ம் ஆண்டு அதிமுக ஆட்சியில், அனைத்துப் பள்ளிகளிலும் 1 முதல் 5-ம் வகுப்பு வரை அறிவியல் தமிழ்ப் பாடம் கற்பிக்கப்படும் என்று பிறப்பிக்கப்பட்ட அரசாணையை செயல்படுத்த நடவடிக்கை எடுக்கப்படவில்லை என்று அவர் குற்றம் சாட்டியுள்ளார்.தமிழ், தற்போது, சிபிஎஸ்இ மற்றும் ஐசிஎஸ்இ பள்ளிகளில் வாரத்திற்கு அதிகபட்சம் 40 நிமிடங்கள் மட்டுமே கற்பிக்கப்படும் 3-வது மொழியாக்கப்பட்டிருப்பதாக கருணாநிதி வேதனை தெரிவித்துள்ளார்.