கோரிக்கைகளை வலியுறுத்தி தொடர் மறியல் தொடக்கப் பள்ளி ஆசிரியர் கூட்டணி முடிவு.

தமிழகத்தில் 7 அம்ச கோரிக்கைகளை வலியுறுத்தி தொடர் மறியல் போராட்டம் நடத்த தொடக்கப் பள்ளி ஆசிரியர் கூட்ணடணி முடிவு செய்துள்ளது.தமிழ்நாடு தொடக்கப் பள்ளி ஆசிரியர் கூட்டணி ஆலங்குளம் வட்டார மறியல் போராட்ட ஆயத்த விளக்க கூட்டம் நடந்தது.ஆலங்குளம் பஞ்., யூனியன் துவக்கப் பள்ளியில் நடந்த கூட்டத்திற்கு ஆலங்குளம் வட்டார தலைவர் இம்மானுவேல் தலைமை வகித்தார். முன்னாள் மாநில பொதுக்குழு உறுப்பினர் மயில்ராஜ் முன்னிலை வகித்தார். வட்டார செயலாளர் ஆரோக்கியராஜ் வரவேற்றார்.தமிழகத்தில் 7 அம்ச கோரிக்கைகளை வலியுறுத்தி செப்டம்பர் 25 முதல் சென்னையில் நடக்கும் தொடர் மறியல் போராட்டம் குறித்து விளக்கப்பட்டது. இடைநிலை ஆசிரியர்களுக்கு மாதம் தோறும் 10 ஆயிரம் ரூபாய்க்கு மேற்பட்ட பாதிப்புகளை நீக்க வேண்டும். ஆசிரியர் தகுதி தேர்வை ரத்து செய்ய வேண்டும். தன் பங்கேற்பு ஓய்வூதிய திட்டத்தை ரத்துசெய்ய வேண்டும். தேர்வு நிலை, சிறப்பு நிலைக்கு தனி தர ஊதியம் வழங்கப்பட வேண்டும் என்பது உட்பட பல்வேறு தீர்மானங்கள் நிறைவேற்றப்பட்டன.மாவட்ட தலைவர் பாலசுப்பிரமணியன், செயலாளர் தர்மராஜ் பிராங்களின், பொருளாளர் ஆறுமுகம், மேலிட பார்வையாளர் செய்யது இப்ராகிம் மூசா உட்பட பலர் பேசினர். வரும் 9ம் தேதி பாளையில் அகில இந்திய ஆசிரியர் கூட்டணி பொது செயலாளர் ஈஸ்வரன் பங்கேற்கும் போராட்ட ஆயத்த கூட்டத்திற்கு ஆலங்குளம் வட்டாரத்தின் சார்பில் 100க்கும் மேற்பட்டோர் கலந்து கொள்வது என்றும் முடிவு செய்யப்பட்டது.நிர்வாகிகள் பாலசுந்தரம், பாலசுப்பிரமணியன், சிவலை பாலு, கீதா கோமதி, முருகேசன், சின்னப்பன், சக்திவேல், மாடசாமி உட்பட பலர் கலந்து கொண்டனர்.வட்டார துணை செயலாளர் அரிச்சந்திரன் நன்றி கூறினார்.