வகுப்பறைக்கு செல்லும் ஆசிரியர்கள் மொபைல் போன் பயன்படுத்த கூடாது; மாவட்ட முதன்மை கல்வி அலுவலர் எச்சரிக்கை

திருப்பூர் மாவட்ட அரசு பள்ளி தலைமை ஆசிரியர்களுக்கான ஆலோசனை கூட்டம் திருப்பூர் பிஷப் உபகாரசாமி மேல்நிலைப்பள்ளியில் நேற்று நடந்தது.

அதில், கலந்துகொண்ட முதன்மை கல்வி அலுவலர் முருகன் பேசும்போது,  ஆறாம் வகுப்பு முதல் எட்டாம் வகுப்பு வரை படிக்கும் மாணவ, மாணவியருக்கு தமிழ் மற்றும் ஆங்கிலத்தில் பேசவும், எழுதவும் தெரிந்திருக்க வேண்டும்.

ஆசிரியர்கள்  அவர்களுக்கு தீவிர வாசிப்பு பயிற்சி அளிக்க வேண்டும். வாரத்தில் இரண்டு பாட வேளைகளை ஒதுக்கி  மாணவ, மாணவியருக்கு அகராதி (டிக்ஸ்னரி) கற்பிக்க வேண்டும். வார்த்தைகளை தவறின்றி எழுதவும், உச்சரிக்கவும், மாணவர்களுக்கு சிறப்பு பயிற்சி அளிப்பது முக்கியம்.

ஆங்கிலம், கணிதம் மற்றும் அறிவியல் பாட ஆசிரியர்களுக்கு கல்வித்துறையின் சார்பில் தரப்படும் சிறப்பு பயிற்சிகளில், தவறாமல் பங்கேற்க வேண்டும்.

படிப்பில் பின்தங்கியுள்ள மாணவர்களை கண்டறிந்து, அவர்களுக்கு பள்ளிகளில் சிறப்பு வகுப்பு நடத்த வேண்டும். அடுத்த ஆண்டில், பொதுத்தேர்வு எழுத உள்ள ஒன்பதாம் வகுப்பு மாணவர்களை, நடப்பு கல்வியாண்டிலேயே சிறப்பு கவனம் செலுத்தி, அவர்களை தேர்ச்சிக்கு தயார்படுத்துவது அவசியம். இதற்கான சிறப்பு தேர்வுகளை அடிக்கடி நடத்தி, அவர்களுக்கு தொடர்ந்து பயிற்சி தருவது அவசியம்.

வகுப்புகளுக்கு செல்லும்போது ஆசிரியர்களும் கட்டாயம், "டிக்ஸ்னரி' எடுத்துச் செல்ல வேண்டும். அரசு தரப்பில் வழங்கப்படும் கல்வி நலத்திட்டங்கள் அனைத்தும் மாணவர்களை சென்றடைய, ஆசிரியர்கள் முழுமையான கவனம் செலுத்துவது முக்கியம்.

கல்வி உதவித்தொகை பெறும் மாணவர்களுக்கு, வங்கிகளில் புதிய கணக்கு துவங்க ஆசிரியர்கள் கட்டாயம் உதவவேண்டும். ரேஷன் கார்டு இல்லாத, முகவரி சான்று அளிக்க முடியாத மாணவர்களுக்கு, பள்ளி சார்பில் சான்று வழங்கி கணக்கு துவங்க ஏற்பாடு செய்யவேண்டும்.

பள்ளி வகுப்பறையில், எக்காரணத்தைக் கொண்டும் ஆசிரியர்கள் “மொபைல்” போன் பயன்படுத்தக்கூடாது. வகுப்பறைக்கு செல்லும் ஆசிரியர்களின் கவனம்  மாணவர்கள் மீது மட்டுமே இருக்கவேண்டும். முழு கவனத்துடன் ஆசிரியர்கள் கற்பிக்கவேண்டும் என அவர் பேசினார்.