அனைத்து சுகோய் விமானங்களின் சேவையும் நிறுத்தம்: கோளாறு கண்டறிந்த பிறகு இயக்க விமானப்படை முடிவு

இந்திய விமானப்படையில் இடம்பெற்றுள்ள, சுகோய் 30 போர் விமானங்கள் அனைத்தும் சேவையில் இருந்து நிறுத்தப்பட்டுள்ளன.

சமீபத்தில் அந்த விமானம் ஒன்று விபத்துக்கு உள்ளானதை அடுத்து, இந்த அதிரடி முடிவு எடுக்கப்பட்டுள்ளது.விபத்திற்கான காரணம் கண்டறியப்பட்ட பிறகு, நிறுத்தப்பட்டுள்ள, 200 விமானங்களையும் இயக்க முடிவு செய்யப்பட்டுள்ளது.

இந்திய விமானப்படையில், 200, சுகோய் 30 விமானங்கள் உள்ளன. இந்த விமானங்களில் ஏற்படும் தொழில்நுட்ப கோளாறால், 2009ல் இருந்து இது வரை, ஐந்து மிகப்பெரிய விபத்துகளில் விமானிகள் பலர் இறந்துள்ளனர்; விமானங்களும் எரிந்து நாசமாகியுள்ளன. கடந்த வாரம், மகாராஷ்டிரா மாநிலம் புனே அருகே, சுகோய் போர் விமானம் விழுந்து நொறுங்கியது.

இதையடுத்து, அந்த விமானங்களில் கோளாறு ஏற்படுவதற்கான காரணங்களை கண்டறிய, அனைத்து, சுகோய் 30 விமானங்களையும் இந்திய விமானப்படை தரையிறக்கியுள்ளது. அடிக்கடி இந்த விமானங்கள் பழுதாவதற்கான காரணம் கண்டறியப்பட்டு, அவற்றை சரி செய்த பிறகே, விமானங்களை மீண்டும் இயக்குவது என, விமானப்படை முடிவு செய்துள்ளது.