10 ஆயிரம் கூடுதல் இடங்கள் உருவாக்க வேண்டும் : அரசு மருந்தாளுனர்கள் போராட்டம்

'மருத்துவ சேவை அதிகரித்து வரும் நிலையில், 10 ஆயிரம் கூடுதல் மருந்தாளுனர் பணியிடங்களை உருவாக்க வேண்டும்' என, அரசு மருந்தாளுனர்கள் சங்கம் வலியுறுத்தி உள்ளது. பல்வேறு கோரிக்கைகளை வலியுறுத்தி, தமிழக அரசு அனைத்து மருந்தாளுனர் சங்கத்தின் சார்பில், சென்னை யில், போராட்டம் நடந்தது. ஏராளமான மருந்தாளுனர்கள் பங்கேற்றனர்.

மாநிலத் தலைவர் கோவிந்தராஜ் கூறியதாவது: மாநிலம் முழுவதும் மருத்துவமனைகள் அதிகரித்து வருகின்றன; பல்வேறு மருத்துவமனைகள் தரம் உயர்த்தப்படுகின்றன. சிகிச்சைக்கு வருவோரின் எண்ணிக்கையும் அதிகரிக்கிறது. ஆனால், 3,800 மருந்தாளுனர் பணியிடங்கள் தான் உள்ளன. 100 புறநோயாளிகளுக்கு ஒருவர் என, 10 ஆயிரம் பணியிடங்களை உருவாக்க வேண்டும். ஆரம்ப சுகாதார நிலையங்களில், பிற ஊழியர்களுக்கு உள்ளது போல், பணி நேரத்தை, 9:00 மணி முதல், 4:00 மணி என, மாற்ற வேண்டும். மருந்துகளை பாதுகாக்க முறையான கிடங்குகள், மருந்தகங்கள் ஏற்படுத்த வேண்டும்; மருந்தாளுனர்களுக்கு பதவி உயர்வு வேண்டும். இந்த கோரிக்கைகளை, ஜனவரி மாதம் நடந்த பேச்சுவார்த்தையில், அரசு ஏற்றுக்கொண்டும், இன்னும் நிறைவேற்றவில்லை. எனவே, போராட்டம் நடத்தி உள்ளோம். அரசு விரைந்து கோரிக்கைகளை நிறைவேற்றும் என, நம்புகிறோம். இல்லாவிட்டால், இம்மாத இறுதியில், அடுத்த கட்டமாக, வேலை நிறுத்த போராட்டம் குறித்து முடிவு செய்வோம்.

இவ்வாறு, அவர் கூறினார்.