ஓட்டுநர், நடத்துநர் தேர்வு முறையில் மாற்றம்: ராமதாஸ் கண்டனம்

அரசுப் போக்குவரத்துக் கழங்களுக்கு ஓட்டுநர், நடத்துநர்களைத் தேர்வு செய்யும் முறையில் மாற்றம் செய்துள்ளதற்கு பாமக நிறுவனர் ராமதாஸ் கண்டனம் தெரிவித்துள்ளார்.

இதுதொடர்பாக புதன்கிழமை அவர் வெளியிட்ட அறிக்கை:

அரசுப் போக்குவரத்துக் கழகங்களுக்கு சேம ஓட்டுநர்கள், சேம நடத்துநர்கள் உள்ளிட்ட பல்வேறு பணியிடங்களுக்குச் சுமார் 16 ஆயிரம் பேரைத் தேர்வு செய்வதற்கான அறிவிப்பு நாளிதழ்களில் வெளியாகியுள்ளது. ஆனால், வழக்கத்துக்கு மாறாக நேரடித் தேர்வு முறையின் மூலம் ஊழியர்கள் தேர்வு செய்யப்பட உள்ளனர்.

ஓட்டுநர்கள், நடத்துநர்கள் உள்ளிட்ட பணிகளுக்கு வேலைவாய்ப்பு அலுவலகத்திலிருந்து தகுதியும், பதிவு மூப்பும் கொண்டவர்களின் பட்டியலைப் பெற்று, சான்றிதழ்கள் சரிபார்ப்பு நடத்தி பணியாளர்களைத் தேர்வு செய்வதுதான் வழக்கம்.

அந்த நடைமுறையைப் பின்பற்றாமல் நேரடியாக விண்ணப்பங்களைப் பெற்று ஓட்டுநர்கள், நடத்துநர்களை நியமிப்பது சரியான நடைமுறையாக இருக்காது.

ஆட்சியாளர்களுக்கு ஒத்துவராதவர்களின் விண்ணப்பங்கள் அனைத்தையும் நிராகரித்துவிட்டு, ஆதரவானவர்களின் விருப்பங்களை நிறைவேற்றும் விண்ணப்பதாரர்களை மட்டும் நியமிக்கும் ஆபத்து இருக்கிறது. எனவே, போக்குவரத்துக் கழக பணியாளர்களை நேரடியாகத் தேர்வு செய்யும் முறையை கைவிட்டு, வேலைவாய்ப்பு அலுவலகங்கள் மூலமாக நியமிக்க அரசு முன்வர வேண்டும் என்றார் ராமதாஸ்.