ஐகோர்ட் தீர்ப்பை மதிக்காத பள்ளிகள்: காஷ்மீரில் கட்டாய கட்டண வசூல்

ஸ்ரீநகர்: ஜம்மு - காஷ்மீரில், செப்டம்பரில் பெய்த கனமழையால், மாநிலத்தின் பெரும்பாலான பகுதிகள் பாதிக்கப்பட்டன.இதையடுத்து, காஷ்மீரில் உள்ள பள்ளிகளில் மாணவர்களிடம் கட்டணம் வசூலிப்பது குறித்து,

அம்மாநில ஐகோர்ட்டில் பொது நல மனு தாக்கல் செய்யப்பட்டது. இந்த மனுவை விசாரித்த கோர்ட், 'மழை, வெள்ளத்தால் பாதிக்கப்பட்ட காஷ்மீர் பகுதியில் உள்ள பள்ளிகள், அங்கு பயிலும் மாணவர்களிடம், செப்டம்பர் மற்றும் அக்டோபர் மாதங்களுக்கான கட்டணத்தை வசூலிக்கக் கூடாது' என, உத்தரவிட்டது. எனினும், சில பள்ளிகள் ஐகோர்ட் உத்தரவை மதிக்காமல், மாணவர்களிடம் கட்டாய கட்டண வசூலில் இறங்கியுள்ளதாக, பெற்றோர் புகார் தெரிவித்துள்ளனர். இதுகுறித்து, சில பள்ளி நிர்வாகிகள் கூறுகையில், 'எங்களிடம் பணியாற்றும் ஆசிரியர்களுக்கு நாங்கள் தான் ஊதியம் வழங்க வேண்டும். அவர்களுக்கு ஊதியம் வழங்கவே, மாணவர்களிடம் கட்டணம் வசூலிக்கிறோம். எங்களுக்கு ஐகோர்ட்டிலிருந்து ஆணையோ, நோட்டீசோ கிடைக்கவில்லை' என்றனர். இதனிடையே, இந்த புகார் தொடர்பாக, விரைந்து விசாரிக்கப்படும் என, காவல் துறையினர் தெரிவித்துள்ளனர்.