உடற்கல்வி ஆசிரியர் ஊதிய முரண்பாடு விவகாரம் தமிழகம் முழுவதும் விரைவில் போராட்டம்

தமிழகம் முழுவதும் உள்ள அரசு மற்றும் அரசு நிதி உதவி பெறும் பள்ளிகளில் 6 முதல் 10ம் வகுப்பு வரை பணியாற்றும் உடற்கல்வி ஆசிரியர்கள் உடற்கல்வி பாடம் நடத்தி வருகின்றனர்.

அவர்கள் பட்டதாரி ஆசிரியர்களுக்கு இணையான கல்வித் தகுதியும், பணிகளும், பொறுப்பும் இந்த போதிலும் ஊதியத்தில் மட்டும் பாகுபாடு நிலவி வருகிறது. அதேவேளையில், மத்திய அரசு பள்ளிகளில் பணியாற்றும் உடற்கல்வி ஆசிரியர்களுக்கு பட்டதாரி ஆசிரியர்களுக்கான ஊதியம் வழங்கப்பட்டு வருவது குறிப்பிடத்தக்கது. அதேபோல, தமிழகத்தில் உயர்நிலை, மேல்நிலைப்பள்ளிகளில் உடற்கல்வியில் இளங்கலை மற்றும் முதுகலை பட்டம் பெற்றவர்களை நியமனம் செய்கிறார்கள். ஆனால் அவர்களுக்கு பட்டதாரி மற்றும் முதுகலைப்பட்டதாரி ஆசிரியர்களுக்கான ஊதியம் வழங்கப்படாமல் இடைநிலை ஆசிரியர்களுக்கான ஊதியம் வழங்கப்படுகிறது.


எனவே இதுபோன்ற ஊதிய முரண்பாடுகளை களைந்து உடற்கல்வி ஆசிரியர்களுக்கும் பட்டதாரி ஆசிரியர்களுக்கான ஊதியம் வழங்க வேண்டும் என்று உடற்கல்வி ஆசிரியர்கள் அரசுக்கு கோரிக்கை விடுத்துள்ளனர். இதுகுறித்து தமிழ்நாடு உடற்கல்வி ஆசிரியர், உடற்கல்வி இயக்குனர் சங்க தலைவர் சங்கரபெருமாள் கூறுகையில், “ 6-10ம் வகுப்பு வரையில் பணியாற்றும் உடற்கல்வி ஆசிரியர்களுக்கு மத்திய அரசுக்கு இணையான ஊதியம் வழங்க வேண்டும். எழுத்து தேர்வு அரசாணை 185ஐ ரத்து செய்து வேலைவாய்ப்பு பதிவு மூப்பின் அடிப்படையில் உடற்கல்வி ஆசிரியர் பணியிடங்கள் நிரப்பப்படவேண்டும். பள்ளிகளில் காலியாக உள்ள 2 ஆயிரம் உடற்கல்வி ஆசிரியர் காலிப்பணியிடங்களை நிரப்ப வேண்டும் உள்ளிட்ட கோரிக்கைகளை வலியுறுத்தி விரைவில் போராட் டம் நடத்தப்படும்“ என்றார்.