பிளஸ் 2 கணிதப் புத்தகம் பகுதி-2 வழங்கியதால் மாணவர்கள் குழப்பம்

திருவள்ளூர் மாவட்டத்தில் பிளஸ் 2 கணிதப் பாட புத்தகம் பகுதி 1-க்கு பதில் பகுதி 2 வழங்கப்பட்டதால் மாணவர்கள் குழப்பம் அடைந்துள்ளனர்.திருவள்ளூர் மாவட்டத்தில் கடந்த சில தினங்களாக பிளஸ் 2 மாணவர்களுககு தமிழக அரசின் விலையில்லா புத்தகங்கள் வழங்கப்பட்டு வருகின்றன.
இந்த நிலையில் திருவள்ளூரில் தனியார் நிதி உதவிப் பள்ளியில் பிளஸ் 2 மாணவர்களுக்கு வழங்கப்பட்ட கணித பாடப் புத்தகத்தில் பகுதி 1-க்கு பதில் பகுதி 2 வழங்கப்பட்டுள்ளது. இதனால் மாணவர்கள் குழப்பம் அடைந்தனர்.இதுகுறித்து அந்தப் பள்ளியில் கேட்டதற்கு கல்வித் துறையில் இருந்து கணித பாடபுத்தகத்தின் பகுதி 2 மட்டுமே வந்துள்ளதாகத் தெரிவித்தனர்.

இதுகுறித்து மாவட்ட முதன்மைக் கல்வி அலுவலரிடம் கேட்டபோது: தமிழக அரசு சார்பில் அனைத்துப் பாடப் புத்தகங்களும் அச்சிடப்பட்டு தயாராக உள்ளன. மேலும்பல பள்ளிகளில் வழங்கப்பட்ட புத்தகத்தை ஆய்வு செய்ததில் பகுதி-1 வழங்கப்பட்டுள்ளது.அந்த குறிப்பிட்ட பள்ளியில் அவர்கள் வாங்கி வந்த புத்தகங்கள் மட்டும் மாறியிருக்கலாம். அவர்கள் முறையாக கேட்டால் அந்த புத்தகங்கள் மாற்றி வழங்கப்படும் என்றார்.