தமிழகம் முழுவதும் அடுத்த மாதம் 8-ந்தேதி ஆசிரியர்கள், ஒரு நாள் அடையாள வேலைநிறுத்தம்

தமிழகம் முழுவதும் அடுத்த மாதம் (அக்டோபர்) 8-ந் தேதி ஒரு நாள் அடையாள வேலைநிறுத்தம் நடைபெறும் என்று தொடக்கப்பள்ளி ஆசிரியர் மன்ற மாநில செயற்குழுவில் தீர்மானம் நிறைவேற்றப்பட்டது.

மாநில செயற்குழு


தமிழ்நாடு தொடக்கப்பள்ளி ஆசிரியர் மன்றத்தின் மாநில செயற்குழு கூட்டம் புதுக்கோட்டையில் நேற்று நடந்தது. கூட்டத்திற்கு மாநில தலைவர் தியோடர் ராபின்சன் தலைமை தாங்கினார். கூட்டத்தில் தமிழ்நாடு தொடக்கப்பள்ளி ஆசிரியர் மன்ற பொதுச்செயலாளர் மீனாட்சிசுந்தரம் சிறப்பு விருந்தினராக கலந்து கொண்டு பேசினார்.

கூட்டத்தில் நிறைவேற்றப்பட்ட தீர்மானங்கள் வருமாறு:-

தமிழகத்தில் பூரண மதுவிலக்கை அமல்படுத்த வேண்டும். திருக்குறளை தேசிய நூலாக மத்திய அரசு அறிவிக்க வேண்டும். தன் பங்களிப்பு ஓய்வூதிய திட்டத்தை ரத்து செய்ய வேண்டும்.மத்திய தொழிற்சங்கங்கள் சார்பில் கடந்த 2-ந் தேதி நடைபெற்ற பொது வேலைநிறுத்தத்தில் பங்கேற்ற ஆசிரியர்களின் ஒருநாள் ஊதியத்தை பிடித்தம் செய்ய முடிவெடுத்துள்ள தமிழக அரசை ஆசிரியர் மன்றம் வன்மையாக கண்டிக்கிறது.

8-ந் தேதி வேலைநிறுத்தம்

15 அம்ச கோரிக்கைகளை வலியுறுத்தி அடுத்த மாதம் (அக்டோபர்) மாதம் 8-ந் தேதி தமிழ்நாட்டில் ஒரு நாள் அடையாள வேலைநிறுத்தம் 24 ஆசிரியர் சங்கங்கள் இணைந்த ஜாக்டோ சார்பில் நடக்கிறது.

இவ்வாறு தீர்மானங்கள் நிறைவேற்றப்பட்டன.