அனைத்து ஊழியர் சங்கத்தினர் பிப்ரவரி 10-ல் காலவரையற்ற வேலை நிறுத்தம்

பல்வேறு கோரிக்கைகளை வலியுறுத்தி அனைத்து ஊழியர் சங்கத்தினர் பிப்ரவரி 10-ல் நடத்தும் காலவரையற்ற வேலை நிறுத்த போராட்டத்தில் நெடுஞசாலை சாலை ஆய்வாளர்கள் பங்கேற்பது உள்ளிட்ட பல்வேறு தீர்மானங்கள் ஞாயிற்றுக்கிழமை திருவள்ளூரில் நடைபெற்ற மாநில பிரதிநிதித்துவ பேரவைக் கூட்டத்தில் நிறைவேற்றப்பட்டன...


தமிழ்நாடு நெடுஞ்சாலைத்துறை சாலை ஆய்வாளர்கள் சங்கத்தின் 2-வது  மாநில பிரதிநிதித்துவப் பேரவை கூட்டம் திருவள்ளூரில் ஞாயிற்றுக்கிழமை நடைபெற்றது. இதில் மாநில தலைவர் எஸ்.வி.ஏகநாதன் தலைமை வகித்தார். சக்திவேல் வரவேற்றார்.தமிழ்நாடு அரசு ஊழியர் சங்க மாநில துணைத் தலைவர் பி.எஸ்.அப்பர் துவக்கவுரை ஆற்றினார். சாலை ஆய்வாளர்கள் சங்க மாநில பொதுச் செயலாளர் மாரிமுத்து அறிக்கை வாசித்தார்.இதில், சாலை ஆய்வாளர்களுக்கு முறையான பயணப்படி, 25 கிலோமீட்டருக்கு மேல் பணிபுரியும் ஆய்வாளர்களுக்கு கூடுதல்பொறுப்புப்படி வழங்க வேண்டும். கருவூலம் மூலம் ஊதியம் வழங்க வேண்டும்.சாலை ஆய்வாளர் நிலை -1, நிலை -2 பணியிடத்தை இணைத்து சாலைஆய்வாளர் என பெயர் மாற்றம் செய்ய வேண்டும். தர ஊதியம் ரூ.2600 வழங்க வேண்டும். பொறியியல் பட்டயப்படிப்பு தேர்ச்சி பெற்ற சாலை ஆய்வாளர்களுக்கு பணி அனுபவ தகுதியைதளர்வு செய்து இளநிலைப் பொறியாளர் மற்றும் இளநிலை வரைத்தொழில் அலுவலர் பதவி உயர்வு வழங்க வேண்டும் உள்ளிட்ட பல்வேறு கோரிக்கைகள் தீர்மானமாக நிறைவேற்றப்பட்டன.

குறிப்பாக வரும் 10-ம் தேதி முதல் அனைத்து துறை ஊழியர்கள் சங்கம் நடத்தும் கால வரையற்ற வேலை நிறுத்தத்தில், நெடுஞ்சாலைத்துறை சாலை ஆய்வாளர்கள் சங்கத்தினரும் ஈடுபடுவது எனவும் தீர்மானம் நிறைவேற்றப்பட்டது. இதில் கே.பாண்டுரங்கன் நன்றி கூறினார்.