பி.எட். தேர்வு எழுத அனுமதி கேட்டு 100 மாணவர்கள் ஐகோர்ட்டில் வழக்கு.

பி.எட். தேர்வு எழுத அனுமதி கோரி சென்னை உயர் நீதிமன்றத்தில் தனியார் கல்லூரி மாணவர்கள் 100 பேர் மனுத் தாக்கல் செய்துள்ளனர்.
வேலூர் மாவட்டம் வாலாஜாபேட்டையில் ஸ்ரீராஜராஜேஸ்வரி கல்வியியல் கல்லூரி இயங்கி வருகிறது. 2006ல் இந்தக் கல்லூரி துவங்கப்பட்டது. கடந்த ஆண்டில் இந்தக் கல்லூரியில் பி.எட். படிப்பில் சேர்ந்த ரகுராமன், அஞ்சலி உள்ளிட்ட 100 பேர் உயர் நீதிமன்றத்தில் தாக்கல் செய்த மனு:நாங்கள், கடந்த ஆண்டில் கல்லூரியில் சேர்ந்தோம். தொடர்ந்து வகுப்புகளுக்கு வருகை தருகிறோம். இந்தக் கல்லூரிக்கு அளிக்கப்பட்ட அங்கீகாரத்தை வாபஸ் பெறுவதாக, கடந்த ஆண்டு ஜூனில் பெங்களூருவில் உள்ள ஆசிரியர் கல்விக்கான தென்மண்டல தேசிய கவுன்சில் உத்தரவிட்டது. இதை எதிர்த்து, டில்லியில் உள்ள தலைமைஅலுவலகத்துக்கு கல்லூரி நிர்வாகம் விண்ணப்பித்தது. இந்தப் பிரச்னையை, தென்மண்டலகவுன்சிலுக்கு அனுப்பி வைத்து, அதுவரை அங்கீகாரம் வாபஸ் உத்தரவை நிறுத்தி வைத்தது.கடந்த, ஜனவரியில் மீண்டும் அங்கீகாரம் வாபஸ் பெறுவதாக தென்மண்டல கவுன்சில் உத்தரவிட்டது.

இதை எதிர்த்து கல்லூரி நிர்வாகம் வழக்கு தொடுத்துள்ளது. இந்நிலையில், இம்மாதம் 30ம் தேதி பி.எட். தேர்வு துவங்குவதாக தமிழ்நாடு ஆசிரியர் கல்வி பல்கலைக்கழகம் அறிவிப்பு வெளியிட்டது. தேர்வு கால அட்டவணையும் வெளியிடப்பட்டு விட்டது. எங்களுக்கு ஹால் டிக்கெட் தர முடியாது என பல்கலைகழகம் தரப்பில் வாய்மொழியாக தெரிவிக்கப்பட்டது. வரும் 30ம் தேதி துவங்க இருக்கும் பி.எட். தேர்வு எழுத எங்களை அனுமதிக்கும்படி ஆசிரியர் கல்வி பல்கலைக்கு உத்தரவிட வேண்டும். இவ்வாறு, மனுவில் கூறப்பட்டுள்ளது.இம்மனு, நீதிபதி எம்.எம்.சுந்தரேஷ் முன், விசாரணைக்கு வந்தது. விசாரணையை இம்மாதம் 28ம் தேதிக்கு நீதிபதி சுந்தரேஷ் தள்ளிவைத்தார்.