செவிலியர் பணியிடம்: 5 ஆயிரம் சான்றிதழ்கள் சரிபார்ப்பு

தமிழக அரசு மருத்துவமனைகளில் உள்ள செவிலியர் பணியிடங்களை நிரப்புவதற்காக இதுவரை5 ஆயிரம் செவிலியர்களுக்கு சான்றிதழ் சரிபார்க்கும் பணிகள் நிறைவுபெற்றுள்ளன.தமிழக அரசு மருத்துவமனைகளில் 7,243 பணியிடங்களுக்கு செவிலியர்களை நியமிப்பதற்கான தகுதித் தேர்வு நடைபெற்றது.


அதில், 38,116 பேர் கலந்து கொண்டனர். தேர்வில் தேர்ச்சி பெற்றவர்கள் சார்ந்துள்ள வகுப்பு, மதிப்பெண் அடிப்படையில் சான்றிதழ் சரிபார்க்கும் பணிகள் நடைபெற்று வருகின்றன.செவிலியர் நியமனத்துக்கான சான்றிதழ் சரிபார்க்கும் பணிகள் சென்னை டி.எம்.எஸ். வளாகத்தில் ஜூலை 22-ஆம் தேதி தொடங்கியது.இதுவரை 5 ஆயிரத்துக்கும் மேற்பட்டோருக்கு சான்றிதழ் சரிபார்க்கும் பணிகள் பூர்த்தியாகி உள்ளன. இதில் தேர்வு செய்யப்பட்டோர் குறித்த பெயர்ப் பட்டியல் மருத்துவப் பணியாளர் தேர்வாணையத்தின் www.mrb.tn.gov.in என்ற இணையதளத்தில் வெளியிடப்பட்டுள்ளது.

இது குறித்து மருத்துவப் பணியாளர் தேர்வாணைய அதிகாரிகள் கூறியதாவது:ஆகஸ்ட் 11-ஆம் தேதி வரை சான்றிதழ் சரிபார்க்கும் பணிகள் நடைபெறும். அதனைத் தொடர்ந்து சான்றிதழ் சரிபார்க்கும் நாள்களில் கலந்து கொள்ளாதவர்களுக்கு தனியாக சான்றிதழ் சரிபார்க்கும் பணிகள் நடைபெறும். சுமார் 7,500 பேர் சான்றிதழ் சரிபார்ப்புக்கு அழைக்கப்பட்டுள்ளனர் என்று அவர்கள் தெரிவித்தனர்.