6 முதல் 9 மற்றும் பிளஸ் 1 வகுப்புகளுக்கான அரையாண்டு தேர்வுக்கான கால அட்டவணை வெளியீடு

 

பள்ளிகளில் 6 முதல் 9-ம் வகுப்பு மற்றும் பிளஸ் 1 பயிலும் மாணவர்களுக்கான அரையாண்டு தேர்வுக்குரிய கால அட்டவணை பாடவாரியாக வெளியிடப்பட்டுள்ளது.

தமிழகத்தில் அனைத்துவிதமான பள்ளிகளிலும் அரையாண்டுத் தேர்வு டிசம்பர் 9 முதல் 23-ம் தேதி வரை நடத்தப்பட உள்ளதாக பள்ளிக்கல்வித் துறை அறிவித்திருந்தது. இதில் 1 முதல் 5-ம் வகுப்புக்கு டிசம்பர் 16-ல் தொடங்கி 23-ம் தேதி வரையும், 6-ம் வகுப்பு முதல் பிளஸ் 2-வுக்கு டிசம்பர் 9 முதல் 23-ம் தேதி வரையும் தேர்வுகள் நடைபெற உள்ளன. எனினும் 10, பிளஸ் 2 வகுப்புகளுக்கு மட்டும் தேர்வுக்கான முழு கால அட்டவணையும் வெளியிடப்பட்டது. மீதமுள்ள வகுப்புக்கான அட்டவணை விரைவில் வெளியாகும் என்று தெரிவிக்கப்பட்டிருந்தது. இந்த நிலையில் 6 முதல் 9-ம் வகுப்பு மற்றும் பிளஸ் 1 வகுப்புகளுக்கான முழு தேர்வு அட்டவணை தற்போது வெளியாகியுள்ளது.

அதன்படி 6 முதல் 9-ம் வகுப்பு மாணவர்களுக்கு டிசம்பர் 9-ம் தேதி தமிழ் பாடத்தேர்வு, டிச.10-ல் விருப்ப மொழி, டிச.12-ல் ஆங்கிலம், டிச.16-ல் கணிதம், டிச.18-ல் உடற்கல்வி, டிச.20-ல் அறிவியல், டிச.23-ம் தேதி சமூக அறிவியல் தேர்வு நடைபெற இருக்கிறது. இதேபோல், பிளஸ் 1 வகுப்புக்கும் பாடவாரியாக அட்டவணை தரப்பட்டுள்ளது. இதில் 6, 8-ம் வகுப்புக்கு காலையும் 7, 9, பிளஸ் 1 வகுப்புகளுக்கு மதியமும் தேர்வுகள் நடத்தப்படும். தொடர்ந்து 1 முதல் பிளஸ் 2 வகுப்பு மாணவர்களுக்கு டிசம்பர் 24 முதல் ஜனவரி 1-ம் தேதி வரை அரையாண்டு விடுமுறை வழங்கப்படும். இந்த விடுப்பு முடிந்து பள்ளிகள் மீண்டும் ஜனவரி 2-ம் தேதி திறக்கப்படும் என்று பள்ளிக்கல்வித் துறை தெரிவித்துள்ளது.