பள்ளி வகுப்பறையில் மது அருந்திய பிளஸ் 2 மாணவர்கள் 6 பேர் நீக்கம்

பள்ளி வகுப்பறையில் மது அருந்தியதாக பிளஸ் 2 மாணவர்கள் 6 பேர் பள்ளியிலிருந்து நீக்கப்பட்டனர்.

நாமக்கல் மாவட்டம், திருச்செங்கோடு அரசு மேல்நிலைப் பள்ளியில் கடந்த வாரம், முன்னாள் மாணவர்கள் ஏற்பாடு செய்திருந்த விழா நடைபெற்றது. அப்போது, பிளஸ் 2 மாணவர்கள் 6 பேர் வகுப்பறையில் அமர்ந்து மது அருந்திவிட்டு ஒழுங்கீனமான முறையில் நடந்து கொண்டதாகத் தெரிகிறது. இது விழாவில் பெரும் சலசலப்பை ஏற்படுத்தியது.

இதையடுத்து, பள்ளித் தலைமை ஆசிரியர் லோகநாதன் அந்த 6 மாணவர்களையும் அழைத்து விசாரித்தபோது, அவர்களில் சிலர் மது குடித்திருப்பது தெரிய வந்தது.

இதைத்தொடர்ந்து, அவர்கள் 6 பேரையும் பள்ளியிலிருந்து நீக்கி தலைமை ஆசிரியர் உத்தரவிட்டார். அவர்களில் ஒரு மாணவர் மட்டும் வேறொரு அரசுப் பள்ளியில் சேர்ந்து கொண்டார். மற்ற 5 பேரும் வேறு பள்ளிகளில் சேரச் சென்ற போது அங்குள்ள தலைமை ஆசிரியர்கள் மறுத்துவிட்டனராம்.

இந்த நிலையில், அவர்களில் 3 மாணவர்கள் தங்களின் பெற்றோர்களுடன் நாமக்கல் மாவட்ட முதன்மைக் கல்வி அலுவலகத்துக்கு வெள்ளிக்கிழமை வந்தனர்.

முதன்மைக் கல்வி அலுவலர் கோபிதாஸ் கொல்லிமலைக்கு ஆய்வுப் பணிக்குச் சென்று விட்டதால், மாணவர்களின் பெற்றோர்களால் அவரைச் சந்தித்து முறையிட முடியவில்லை.

இதையடுத்து, அங்கிருந்த அலுவலர்களைச் சந்தித்து முறையிட்டனர்.

இதுகுறித்து முதன்மைக் கல்வி அலுவலர் எஸ்.கோபிதாஸ் கூறுகையில், 6 மாணவர்களும் ஒழுங்கீனமான முறையில் நடந்து கொண்டதால், அவர்கள் மீது நடவடிக்கை எடுத்துள்ளதாக தலைமை ஆசிரியர் கூறினார்.

மாணவர்கள், அவர்களின் பெற்றோர்களை அழைத்துப் பேசி உரிய அறிவுரை அளிக்கப்படும். மற்ற 5 மாணவர்களும் வெவ்வேறு அரசு பள்ளிகளில் சேர நடவடிக்கை எடுக்கப்படும் என்றார்.