மதுரையில் நாளை எஸ்.ஐ., தேர்வுக்கான இலவச பயிற்சி: தினமலர் நடத்துகிறது

தமிழ்நாடு காவல்துறை சார்பில் நடக்கும் எஸ்.ஐ., தேர்வில் பங்கேற்போருக்காக, மதுரையில் தினமலர் நாளிதழ் நடத்தும் இலவச பயிற்சி முகாம் நாளை (மே10) பசுமலை மன்னர் திருமலை நாயக்கர் கல்லூரியில் மாலை 4 மணி முதல் 6 மணி வரை நடக்கிறது. காவல் துறையில் பின்னடைவு பணியிடங்கள் உட்பட 1078 எஸ்.ஐ., பணியிடங்கள் நிரப்பப்படவுள்ளன.

பொது ஒதுக்கீடு பிரிவினருக்கு வரும் 23ம் தேதியும், போலீஸ் துறை ஒதுக்கீடு பிரிவுக்கு 24ம் தேதியும் எழுத்து தேர்வு நடக்கிறது. பொது ஒதுக்கீடு பிரிவில், மொத்தம் 70 மதிப்பெண்களுக்கு எழுத்து தேர்வு நடக்கும். இதில், பொதுஅறிவு பிரிவில் 40 மதிப்பெண்களுக்கு 80 வினாக்களும், உளவியல் பிரிவில் 30 மதிப்பெண்களுக்கு 60 வினாக்கள் என மொத்தம் 140 வினாக்கள் இடம் பெறும். இதுதவிர உடல்திறன் தேர்வுக்கு 15 மதிப்பெண், நேர்முக தேர்விற்கு 10 மதிப்பெண், சிறப்பு மதிப்பெண் (என்.சி.சி., என்.எஸ்.எஸ்.,) ஐந்து என மொத்தம் நூறு மதிப்பெண்ணிற்கு தேர்வு நடக்கும். இரண்டரை மணிநேரம் தேர்வு நடக்கும். இந்த தேர்வில் பங்கேற்கும் வாசகர்களுக்கு வழிகாட்ட இந்நிகழ்ச்சியை தினமலர் நடத்துகிறது. திட்டமிட்டு தேர்வுக்கு எவ்வாறு தயாராவது, பதட்டமின்றி தேர்வை எதிர்கொள்வது எப்படி, படித்ததை எவ்வாறு நினைவில் வைத்துக்கொள்வது போன்ற அரிய ஆலோசனைகள் வழங்கப்படுகிறது. மதுரை நேஷனல் இன்ஸ்டிடியூட் ஆப் பேங்கிங் நிர்வாக இயக்குனர் வெங்கடாசலம் கருத்துரை வழங்குகிறார். தினமலர் அளிக்கும் இந்த அரிய வாய்ப்பை பயன்படுத்தி தேர்வில் வெற்றி பெற வாருங்கள்.