பள்ளி மாணவர்களுக்கு காலை சிற்றுண்டி: புதிய கல்வி கொள்கையில் பரிந்துரை - kalviseithi

Aug 3, 2020

பள்ளி மாணவர்களுக்கு காலை சிற்றுண்டி: புதிய கல்வி கொள்கையில் பரிந்துரை


பள்ளி மாணவர்களின் ஊட்டச்சத்தை மேம்படுத்த மதிய உணவுடன், காலை சிற்றுண்டியும் வழங்கப்படும் என புதிய கல்வி கொள்கையில் மத்திய அரசு தெரிவித்துள்ளது.

கடந்த, 1986ல், அப்போதைய பிரதமர் ராஜிவ் தலைமையிலான, காங்., அரசு கொண்டு வந்த, தேசிய கல்விக் கொள்கையே, தற்போது நாடு முழுவதும் அமலில் உள்ளது. இந்நிலையில், இந்தியாவின் புதிய கல்விக் கொள்கை, ஜூலை 29 -ல் மத்திய அரசு வெளியிட்டது. இந்த புதிய கல்விக் கொள்கைக்கு நாடு முழுவதும் வரவேற்பு எழுந்துள்ள நிலையில், எதிர்க்கட்சிகளில் இருந்து சில ஆதரவு கருத்துகளும், எதிர்ப்பு கருத்துகளும் வருகின்றன.

புதிய கல்வி கொள்கையில் பல்வேறு முக்கிய அம்சங்கள் இடம்பெற்றுள்ள நிலையில், முக்கியமான அம்சமாக, மாணவர்களுக்கு காலை சிற்றுண்டி வழங்கும் திட்டமும் உள்ளது. அதாவது, குழந்தைகளின் மூளை சுறுசுறுப்பாகவும், ஆக்கபூர்வமாகச் சிந்திக்கவும், கல்வி கற்கவும், மதிய உணவு மட்டுமன்றி, காலை சிற்றுண்டியும் அவசியம் என இதில் தெரிவிக்கப்பட்டுள்ளது.

இதுதொடர்பாக புதிய கல்வி கொள்கையில் கூறப்பட்டுள்ளதாவது:

* நாடு முழுவதும் 11.59 கோடி அரசு பள்ளி மாணவர்கள் மதிய உணவு திட்டத்தின் மூலம் பயனடைந்து வருகின்றனர். 16 லட்சம் சமையலர்கள், உதவியாளர்களும் இதன் மூலமாக வேலை வாய்ப்பை பெறுகின்றனர்.

* குழந்தைகள் சத்துக் குறைபாட்டுடன் இருந்தால் அல்லது நல்ல உடல்நிலையில் இல்லாவிட்டால் அவர்களால் முழுமையாக கல்வி கற்க முடியாது. எனவே, அவர்களுக்கு மனவளம் மற்றும் சத்துள்ள உணவையும் வழங்க வேண்டும். சமூக சேவகர்கள், ஆலோசகர்கள், சமூக அமைப்பினரின் பங்களிப்பு ஆகியவை மூலம் சமூகத்துடன் ஈடுபாட்டை உருவாக்கலாம்.

* காலையில் சத்தான உணவுக்குப் பின் மாணவர்கள் படிக்கும்போது. ஆக்கபூர்வமாகச் செயல்பட முடியும். பாடங்களில் அதிக ஆர்வமும் ஏற்படும். எனவே, மதிய உணவுடன் மாணவர்களுக்கு எளிமையான, புத்துணர்ச்சி அளிக்கக் கூடிய சத்தான காலை உணவு வழங்கப்பட வேண்டும்.

* சூடான காலை உணவு வழங்க முடியாத இடங்களில் எளிதான, சத்து மிகுந்த நிலக்கடலைகள், கடலை மிட்டாய் வழங்கலாம். உள்ளூரில் கிடைக்கும் பழங்களும் வழங்கப்பட வேண்டும்.

* அனைத்து பள்ளி குழந்தைகளுக்கும் 100 சதவீதம் தடுப்பூசி போடப்பட்டு இருப்பதை உறுதி செய்ய வேண்டும். குறிப்பிட்ட கால இடைவெளியில் அவர்களுக்கு உடல் பரிசோதனை நடத்த வேண்டும்.

* 5 வயதுக்கு உட்பட்ட அனைத்து குழந்தைகளையும், கட்டாயம் அங்கன்வாடி, பால்வாடிகளில் சேர்க்க வேண்டும். அவர்களுக்கு ஆற்றல், உணர்வு, உளவியல் ஆகியவற்றில் கவனம் செலுத்தும் வகையில், விளையாட்டுடன் கூடிய கல்வி விளையாட்டுடன் கூடிய கல்வி கற்பிக்கப்படும். இதனால் அவர்களின் அறிவாற்றல், திறன், உளவியல் வளர்ச்சி அடையும். இவ்வாறு அதில் தெரிவிக்கப்பட்டுள்ளது.

No comments:

Post a Comment

கல்விச்செய்தி நண்பர்களே..
நீங்கள் ஒவ்வொருவரும் கல்விச்செய்தியின் அங்கமே..
வாசகர்களின் கருத்து சுதந்திரத்தை வரவேற்கும் இந்தப்பகுதியை ஆரோக்கியமாக பயன்படுத்திக் கொள்ள அன்புடன் வேண்டுகிறோம்.

குறிப்பு:
1. இங்கு பதிவாகும் கருத்துக்கள் வாசகர்களின் சொந்த கருத்துக்களே. கல்விச்செய்தி இதற்கு எவ்வகையிலும் பொறுப்பல்ல.
2. கருத்தை நிராகரிக்கவோ, குறைக்கவோ, தணிக்கை செய்யவோ கல்விச்செய்தி குழுவுக்கு முழு உரிமை உண்டு.
3. தனிமனித தாக்குதல்கள், நாகரிகமற்ற வார்த்தைகள், படைப்புக்கு பொருத்தமில்லாத கருத்துகள் நீக்கப்படும்.
4. தங்களின் பெயர் மற்றும் சரியான மின்னஞ்சல் முகவரியை பயன்படுத்தி கருத்தை பதிவிட அன்புடன் வேண்டுகிறோம்.
-அன்புடன் கல்விச்செய்தி